കൊല്ലന്റെ പടിയിൽ ചായക്കച്ചവടം  ചെയ്തുകൊണ്ടിരുന്ന കണ്ണത്ത് താമിക്കുട്ടിയേട്ടൻ നിര്യാതനായി. ഇന്നലെ (1-10-2012) രാവിലെ പതിനൊന്നു മണിയോടു കൂടിയായിരുന്നു മരണം. കടവനാട്, പള്ളപ്രം, കറുകത്തിരുത്തി ഭാഗത്ത് ഇദ്ദേഹത്തിന്റെ സല്ക്കാരം സ്വീകരിക്കാത്തവരായി ആരുമുണ്ടാകില്ല. നമ്മുടെ നട്ടിലെ പഴയ കാലത്തെക്കുറിച്ചു ഇത്രയതികം വിവരങ്ങൾ അറിയാവുന്ന ഒരാൾ വേറെ ഉണ്ടായിരിക്കും എന്നു തോന്നുന്നില്ല .വേണമെങ്കിൽ കടവനാടിന്റെ എൻസൈക്ളോപീഡിയ എന്ന വിശേഷണതിന് അർഹതയുള്ള ഏറ്റവും അനുയോജ്യനായ വ്യക്തി താമിക്കുട്ടിയേട്ടൻ ആയിരിക്കും. കടവനാടിന്റെ ഓരോ സ്പന്ദനവും കാലമെന്ന മാധ്യമത്തിലൂടെ ഇദ്ദേഹം നോക്കികണ്ടു. 
കടവനാടിന്റെ രാഷ്ട്രീയവും, മതപരവും, സാംസ്കാരികവുമായ എല്ലാ ചർച്ചകൾക്കും ഇദ്ദേഹത്തിന്റെ ചായക്കട വേദിയാവാറുണ്ട്. ആലങ്കാരികമായി പറയുകയാണെങ്കിൾ മിക്ക ചർച്ചകളിലും അധ്യക്ഷ പദവി അലങ്കരിക്കുന്നതും ഇദ്ദേഹമായിരിക്കും. രാവിലെ 4:30 മുതൽ തുടങ്ങുന്ന ചർച്ചകളും സംവാദങ്ങളും പ്രാദേശികമായ വാർത്തകളും കേൾക്കുന്നതിനും അതിൽ ഭാഗമാവാനും  ഒരുപാടു പേർ അതിരാവിലെ ഇവിടെ എത്താറുണ്ട്.  
ആധികാരികമായി പറയാൻ കഴിയുന്ന മറ്റൊരു കാര്യം ഞാൻ ഇവിടെ സൂചിപ്പിക്കാം ഈ കടയായിരുന്നു കടവനാടിന്റെ മാര്യേജ്ബ്യൂറോ.  ഒരുവിധം അനേക്ഷണങ്ങളുടെയെല്ലാം ആരംഭം തുടങ്ങുന്നത് ഇവിടെനിന്നായിരുന്നു അതുകോണ്ട് തന്നെ കടവനാടിന്റെ യുവാകൾക്ക് ഇദ്ദേഹത്തോട് ഒരു തരം പ്രത്യേക ബഹുമാനമായിരുന്നു.

താമിക്കുട്ടിയേട്ടൻ ഇന്ന് കടവനാടിന്റെ ചരിത്രത്തിന്റെ ഭാഗമായിരിക്കുന്നു. താമിക്കുട്ടിയേട്ടന്‌ കടവനാട് മാഗസിന്റെ ആദരാഞ്ജലികൾ!



തയ്യാറാക്കിയത് : ശരത്ബാബു പുക്കയിൽ

പൊന്നാനി:വെളിയങ്കോട് പഞ്ചായത്തിനെയും പൊന്നാനി നഗരസഭയെയും എളുപ്പമാര്‍ഗം ബന്ധിപ്പിക്കാന്‍ കടവനാട് പൂക്കൈത പുഴയില്‍ പാലം നിര്‍മാണത്തിനുള്ള പൈലിങ് തുടങ്ങി.

200 മീറ്റര്‍ നീളത്തിലും ഏഴര മീറ്റര്‍ വീതിയിലും നടപ്പാതയോടുകൂടിയാണ് പാലം നിര്‍മിക്കാന്‍ ഉദ്ദേശിക്കുന്നത്. ചാവക്കാട് നാഷണല്‍ ഹൈവെ അതോറിറ്റിയാണ് പൈലിങ് പ്രവൃത്തികള്‍ക്ക് നേതൃത്വം നല്‍കുന്നത്. പൈലിങ്ങിനായി പൊന്നാനി നഗരസഭ ഏഴുലക്ഷംരൂപ വകയിരുത്തിയിട്ടുണ്ടെന്ന് പദ്ധതി പ്രദേശത്തെ കൗണ്‍സിലര്‍മാരായ പുന്നക്കല്‍ സുരേഷും ആയിഷയും പറഞ്ഞു. കടവനാട് പ്രദേശത്തുള്ളവരുടെ ദീര്‍ഘകാല സ്വപ്നമാണ് പൂക്കൈത കടവ് പാലം. ഇ.ടി. മുഹമ്മദ്ബഷീര്‍ എം.പിയുടെ പ്രത്യേക താത്പര്യപ്രകാരമാണ് പദ്ധതി ആവിഷ്‌കരിക്കുന്നത്. പുഴയുടെ ഇരു കരകളിലും പുഴയിലും പാലം നിര്‍മിക്കാനുള്ള പാറ കണ്ടെത്തുന്ന പ്രവൃത്തിയാണ് ഇപ്പോള്‍ നടന്നുകൊണ്ടിരിക്കുന്നത്. പാലത്തിന് 20 കോടിയിലേറെ ചെലവ് വരുമെന്നാണ് പ്രതീക്ഷിക്കുന്നത്. പദ്ധതി യാഥാര്‍ഥ്യമായാല്‍ പൊന്നാനി നഗരസഭയില്‍നിന്ന് വെളിയങ്കോട് പഞ്ചായത്തിലേക്ക് അഞ്ച് കിലോമീറ്ററോളം ദൂരം കുറയും.

മാത്രമല്ല ചമ്രവട്ടം പാലം വഴി കോഴിക്കോട്ടുനിന്ന് എറണാകുളത്തേക്ക് വരുന്ന വാഹനങ്ങള്‍ക്ക് ചമ്രവട്ടം പള്ളപ്രം ദേശീയപാതയിലെ ഉറൂബ്‌നഗര്‍ വഴി പൂക്കൈത കടവ് പാലത്തിലൂടെ പോയാല്‍ 43 കിലോമീറ്ററോളം ലാഭിക്കാം.

സുഹൃത്തുക്കളെ മാതൃഭൂമിയിലെ ഈ സന്തോഷവാർത്തയുടെ കൂടുതൽ വിവരങ്ങൾ അറിയണമെന്നുണ്ട്. അപ്ഡേറ്റു ചെയ്യുവാൻ കഴിയുന്നവർ http://www.facebook.com/photo.php?fbid=488547264493035&set=a.488546847826410.130216.100000132974934&&ref=nf# ഈ ഫെയ്സ്ബുക്ക് വിലാസത്തിൽ വിവരങ്ങളും ചിത്രങ്ങളും അപ്ഡേറ്റുചെയ്താൽ കിട്ടുന്ന മുറക്ക് കടവനാടുമാഗസിനിൽ പ്രസിദ്ധീകരിക്കുകയും വിദേശത്തുള്ള കടവനാട്ടുകാർക്ക് അതൊരു അനുഗ്രഹമാകുകയും ചെയ്യുമെന്ന് കരുതുന്നു. സഹകരിക്കുമെന്ന പ്രതീക്ഷയോടെ...
email: [email protected]

അനുബന്ധം :“മെട്രോ റെയിലും ആകാശനഗരവുമല്ല ഒരു കൊച്ചുപാലം” കേൾക്കുന്നുണ്ടോ.... കേൾക്കുന്നുണ്ടോ....
                      അഞ്ചാംനമ്പർ പാലം ഒരു രാഷ്ട്രീയ തരികിട

കിട്ടച്ചാച്ച എന്ന് കടവനാട്ടുകാർ സ്നേഹപൂർവ്വം വിളിച്ചിരുന്ന നാരോത്ത് വളപ്പിൽ കിട്ട എന്നവരുടെ വിധവയും കുട്ടികളും പഴകിദ്രവിച്ചു വീഴാറായ ഓലപ്പുരയിൽ നിന്നും മോചനം ആഗ്രഹിച്ചാണ് മുനിസിപ്പൽ അധികൃതരുടെ മുന്നിൽ ഒരു വീടിനായി യാചിച്ചു നിൽക്കുന്നത്. പല ഭവന പദ്ധതികൾ നഗരസഭയുടെ മുന്നിൽ വരുകയും പോകുകയും ചെയ്യുന്നു. അർഹതയുള്ളവരും ഇല്ലാത്തവരും പങ്കിട്ടെടുക്കുന്നു. എന്നാൽ ഈ ദരിദ്ര കുടുംബത്തെ മാത്രം ഒരു പദ്ധതിയും തേടിയെത്തുന്നില്ല. പല കാരണങ്ങൾ പറഞ്ഞ് പലയിടത്ത് വെച്ച് അവരുടെ സ്വപ്നം വഴിമാറിപ്പോകുന്നു.

മാഗസിൻ ഇവിടെ ഒരു കുടുമ്പത്തിന്റെ ദു:ഖം പങ്കുവെക്കുകയാണ്. അധികാരിവർഗ്ഗത്തിന്റെ ബധിരകർണ്ണങ്ങളിലേക്ക് തുളച്ചുകയറാനുള്ള ശക്തി മാഗസിന്റെ അലർച്ചകൾക്കുണ്ടോ എന്നറിയില്ല. ഒരു കൌൺസിലർ, ഒരു രാഷ്ട്രീയ പ്രവർത്തകൻ, അല്ലെങ്കിൽ ഏതെങ്കിലും ഒരു സാമൂഹ്യപ്രവർത്തകൻ മുങ്കയ്യെടുത്താൽ പരിഹരിക്കാവുന്ന ഒരു ചെറിയ നല്ലകാര്യം. അങ്ങിനെയാരുടെയെങ്കിലും കണ്ണില്പെടുമെന്ന പ്രതീക്ഷയാണ് ഈ കുറിപ്പിനു പിന്നിൽ. ഇനിയും പാതിവഴിയിൽ വീണുപോകാതെ, കടവനാട് പറങ്കിവളപ്പ് അമ്പലത്തിനടുത്ത് പൊളിഞ്ഞുവീഴാറായ ഓലപ്പുരയിൽ താമസിക്കുന്ന  കിട്ടച്ചാച്ചയുടെ കുടുംബത്തിന്റെ സ്വപ്നം ‘സുരക്ഷിതമായ ഒരു വീട്’ യാഥാർത്ഥ്യമാകട്ടെ എന്ന് ആശിക്കുന്നു.

കുറിപ്പിന് ആധാരം : http://www.facebook.com/kadavanadmagazine/posts/137567036376606

കടവനാടിനു വേണ്ടി പ്രത്യേക കുടിവെള്ള പദ്ധതി പ്രഖ്യാപിച്ച പൊന്നാനി നഗരസഭയ്ക്കും തീരദേശ വികസന കോർപ്പറേഷനും കടവനാട് മാഗസിന്റെ നന്ദി അറിയിക്കുന്നു.

പദ്ധതിയെക്കുറിച്ചുള്ള മാതൃഭൂമി വാർത്ത:

പൊന്നാനി: കാലങ്ങളായുള്ള കടവനാട്ടുകാരുടെ കുടിവെള്ള പ്രശ്‌നത്തിന് പരിഹാരമാകുന്നു. കുടിവെള്ളക്ഷാമം നേരിടുന്ന പൊന്നാനി നഗരസഭയിലെ കിഴക്കന്‍ മേഖലയായ കടവനാട്ടെ ശുദ്ധജലവിതരണം പുനഃസ്ഥാപിക്കാന്‍ 40 ലക്ഷം രൂപയുടെ വികസന പ്രവര്‍ത്തനങ്ങള്‍ക്ക് തുടക്കമായി.

ജല അതോറിറ്റിയുടെ ചമ്രവട്ടം ജങ്ഷനിലെ ടാങ്കില്‍നിന്ന് കടവനാട് ഭാഗതേക്ക് വെള്ളമെത്തിക്കുന്നത് വ്യാസം കുറഞ്ഞ കാലഹരണപ്പെട്ട പൈപ്പുകള്‍ വഴിയാണ്. കടവനാട് ഭാഗത്തേക്ക് ശുദ്ധജലമെത്തുന്ന െൈപപ്പ് വലുപ്പം കൂട്ടിയാണ് പദ്ധതി നടപ്പാക്കുന്നത്. ഇനിമുതല്‍ തൃക്കാവ് മഹിളാസമാജത്തിനടുത്തെ ടാങ്കില്‍ നിന്നായിരിക്കും വെള്ളം വിതരണംചെയ്യുക.

കടവനാട് മേഖലയിലെ വീടുകളില്‍ പൊതുടാപ്പുകള്‍ സ്ഥാപിക്കുന്ന പദ്ധതി നേരത്തെ തുടങ്ങിയിട്ടുണ്ട്. തീരദേശ മേഖലയിലെ കുടിവെള്ളപ്രശ്‌നം പരിഹരിക്കുന്നതിന് 30 ലക്ഷം രൂപയുടെ പദ്ധതിയില്‍ 20 ലക്ഷം നഗരസഭയുടെ ജനകീയാസൂത്രണ പദ്ധതിപ്രകാരവും 20 ലക്ഷം തീരദേശ വികസന കോര്‍പ്പറേഷനില്‍ നിന്നുമാണ്.

പദ്ധതിയുടെ പ്രവൃത്തി ഉദ്ഘാടനം കടവനാട് പടന്നേലകത്ത് ക്ഷേത്രപരിസരത്ത് നഗരസഭാ ചെയര്‍പേഴ്‌സണ്‍ പി. ബീവി നിര്‍വഹിച്ചു. സ്റ്റാന്‍ഡിങ് കമ്മിറ്റി ചെയര്‍മാന്‍ ഉണ്ണികൃഷ്ണന്‍ പൊന്നാനി അധ്യക്ഷതവഹിച്ചു. എം. ഹൈദരലി, എം.പി. സീനത്ത്, പുന്നക്കല്‍ സുരേഷ്, സി.പി. മുഹമ്മദ്കുഞ്ഞി, ആയിഷ അബ്ദു, മുള്ളത്ത് സതി, എം. റീന, ഷീബ സുരേഷ്, നഗരസഭാ സൂപ്രണ്ട് രാജന്‍, മുനിസിപ്പല്‍ എന്‍ജിനിയര്‍ കുമാരി മിനി എന്നിവര്‍ പ്രസംഗിച്ചു.

അനുബന്ധം : ദുരിതത്തിന്റെ കൈപ്പുനീര്‍ കുടിച്ചു കടവനാട് ഹരിജന്‍ കോളനി..!!